琴日講新紥高官陳智遠，有感而發，小弟覺得今日啲年輕人打工o既心態同小弟想當年有好大o既出入。今日睇都市
黃sir篇文，咁啱得咁巧，又係講今時今日畢業生o既心態。
想當年初出來做o野o既時候，真係好似一張白紙，乜都唔識。想學o野又驚做錯o野，啲o野唔識做，戰戰兢兢咁問senior。senior雖然好nice，但係佢好忙，都冇乜時間可以教我o野。所以好多o野都係靠自己摸，從錯誤中學習。
當時，成日有好多奇怪o既念頭，唔知點實行，又冇人指點，所以成日行o左好多冤枉路。冤枉路唔係白行o既。有時好多idea，邊啲work，邊啲唔work，真係要自己落手落腳做先知到。
o個時一個人做到十點十一點，星期六日無休，做到老細叫小弟keep匙，無非都係想將自己諗出來天馬行空o既idea完成。到最後個project順利出街，個心情真係有啲懷胎十月生o左個B o個份喜悅。諗翻轉頭，真係有啲天真同傻，免費幫老細OT，一個人做三個人o野，換來o既只係一句「well done」，人工加多少都冇。不過，o個時o既小弟一心希望可以証明自己o既實力，得到人地o既認同，可能呢啲就叫做年輕人o既傻勁。
到而家，小弟由當初o既junior變成而家o既老屎忽，coach過唔少新人。除o左一兩個特別例子之外，發覺而家o既後生仔心態上真係唔多同。
鍾意同人比較，成日「fair」係口邊
========================
唔知點解「fair」呢個字會俾人做o左口頭禪。有啲junior知道自己人工同啲同期o既唔同，話同工唔同酬，唔「fair」。又有次知道同期升o左，但自己冇得升，就鬼剎咁嘈，又話唔「fair」，話要轉工，又話要去投訴。大佬！唔好o野o野玩投訴，老細又會話小弟睇唔住啲細o架啦。
打個比喻，你可以當打工當鬥場波，appraisal system就係場波o既規則。開波之前，緊係要知踢唔踢offside、打幾多分鐘、等等。如果隊友送個波上前場，你冇人mark，見機不可失，即刻大腳送個波入網。點知球証話越位，個球唔計數。你去球証投訴，球証緊係睬你都o徒氣。你再嘈，球証醒多個黃牌畀你。 所以，打工一定要知appraisal system係點。
要知道appraisal system多數包裝到好objective，其實所有o野都係掌握在你老闆都手中。你唔知appraisal個黑暗面，以為個system好objective，你所有出o既effort可以得到回饋。咁，你可能會好失望。要知道appraisal係高層揀卒o既手段，你要問自己同高層o既關係。如果你o既印象係高層心目中好模糊，咁你o既努力一定會打個折扣。如果你係高層心目中有好印象，咁就恭喜哂！就萛你做八成，都可能有十足o既回報，社會就係咁現實。不過，小弟唔係叫你擦鞋，好多老闆都唔鍾意人擦鞋。齋擦鞋冇實力，好多時死o左都唔知咩事。
對小弟黎講，識得揀o野做好重要。做得好，不如揀得好。識得揀high profile o野做，做得好又做得圓滑，咁你就令高層另眼相看。當然，high profile等如high risk，如果你唔掂，個task鑊o左，你會千夫所指，會死得更難睇。take唔take risk，就睇你o既信心同實力。
anyway，加人工升職係際遇o既問題，好睇彩數。如果你insist你口中o既fair、多勞多得，不如盡快轉工好過，可能會搵到個打工仔o既「烏托邦」。如果你真係諗住玩o野，你都係搵個第二個藉口去做佢，appraisal唔fair好難做得入o架。
講開又講，仲有啲junior，唔知係唔係仲活係七八十年代，個世界變o左都唔知。仲會以為唔使博，坐係到，排隊可以升職。邊仲有「人升你又升」支歌仔唱o架，想升，咁你等多幾年開曉先啦，真係另外一個extreme。
唔多扺得諗，做o野走精面
==================
唔知大家覺唔覺，回歸十年，香港人真係唔同o左。唔係話啲乜o野「赤化」、「統戰」，小弟講o既係香港地個人主義嚴重o左，有氾濫o既趨勢。啲junior精甩尾，未學行，先學走，好似小弟呢啲老屎忽一樣，成日耍o野做。
server有事要reboot，叫個junior去data centre boot機，個junior會講「呢個system唔係我跟開，你叫xx做啦。」。頂！xx放o左假，如果xx係到就唔使叫你啦。有o野要restore，叫個junior去contingency site攞backup，個junior會講「我有啲o野跟緊，可唔可以叫其他人去。」頂！要restore，緊係爆大鑊，唔好話你啲o野放低一陣都唔得。
小弟都明係人都唔想做boot機、攞backup哩啲冇value o既dirty work，不過啲dirty work一定要人做。如果其他人比你更productive，least productive既junior係唔係應該扺諗啲頂o左啲dirty work做呢? 更何況小事成就大事， 一切從小事做起。如果你可以成熟處理dirty work哩啲小事，senior同老闆會畀機會你處理一啲更重要o既task。
又講，有時，有啲junior就萛應承，都係口服心唔服，做都係是但做畀你，求其交差就萛。叫佢boot機，未boot好就走，最後要call佢返去boot多次。叫佢攞backup，可以攞o左前日o既返來。都唔明橫掂都係做，做戲都做全套，就萛係dirty work，都要用心去做。
又又講，成個世界o既風氣係要快，覺得識走shortcut、精面就好醒。之不過，得過「快」字但做錯哂都係冇用。其實，每一個工序，環環緊扣，有人出錯，就slow down成個flow。如果你得過且過，胡混過骨，你做錯o左，下一手就要執你o既屎。你可以話人地死人地事，唔好事事入我數。咁你諗吓如果你上手都係咁，你可以點萛。anyway，唔係叫你做o野慢吞吞，不過走shortcut時，要諗清楚會有咩risk，鑊o左有咩impact。如果唔justify，就最好踏踏實實，做好哩份工啦。
冇乜禮貌，又唔多尊重啲同事
====================
唔明啲人咁鍾意玩我行我素，唔係好理其他人o既感受。朝早冇「早晨」，放工冇「走先」唔在講。同佢傾o野又鬼死咁唔耐煩，成日心不在焉。 做錯o野又唔認，仲要話翻你講得唔清楚。最抵死係學人講是非，仲要同對頭team啲人講，真係死得。
有個自信爆棚o既後生仔，個人幾聰明，不過聰明反被聰明誤。目中無人，我行我素，成日challenge人，又唔cooperative。搞到啲senior同老細都唔鍾意佢，最後都係自己辭職返翻U讀書。 如果佢繼續咁自大，academic都未必容納到佢。
禮貌同尊重係出黎做o野同處世o既基本條件。出黎做o野一定要同人合作，合作建基於信任，而信任建基於尊重。如果你唔尊重人，你自然剋人憎，小弟諗冇人鍾意同啲剋佢憎o既人做o野。就萛你幾勁都好，如果冇人想同你做o野，小弟諗你都好難做到啲成績出黎。
有o野唔做，成日神神秘秘
==================
有啲人返工遲到早退不特只，做o野又冇尾飛堶 ，唔交帶 。成日有私人電話，一有電話就走o左去，一講就半個鐘。食飯永遠走o左人，好似要避開team啲人。成日神神秘，係街撞到扮睇唔到，call佢又唔接。
又有個後生仔，做o野好臘又鍾意玩神秘，一個簡單task可以做成個禮拜。見親佢都係道玩IM，玩facebook。有時，甚至成日唔見o左人，唔知做乜。問佢有冇問題o既時候，又話冇問題。問佢進度又咦咦哦哦，唔知做到邊。後來先知佢溝緊隔離team條新女，有自己o野唔做去做人地啲o野。唔見o左人，就係去o左幫人。得悉此事後，小弟當然摌佢摌上天花板。不過唔使小弟摌佢，佢都得應有o既教訓，可能佢做得太揚或者條女只係當佢係水泡，最後都係溝唔到條女。講真，小弟唔反對(但唔贊成)係公司溝女。不過，溝唔溝到都可能影響工作，真係後果自負。
人緊係有私人o野做。小弟有時都會係公司炒吓股票，上吓網，所以小弟都唔mind人係公司做自己o野。但係有公司o野唔做，去溝女、day trade、溫書、做功課、甚至去秘撈、interview真係過唔到小弟個關。再加上啲人心虛又好、自我又好，做到鬼死咁鬼鼠，玩神秘咁仲死多幾錢。講真小弟自問幾open，如果你可以開心見誠話我聽，小弟都會考慮隻眼開隻眼閉。但你唔當小弟係自己友，以為唔話我聽，小弟就唔知，小弟就要你死得更難睇，哈哈！
最後，黃sir o既column真係一個好o既reference。雖然有啲文老土o左啲，不過佢真係講出老闆o既心聲，打工仔o既心法。如果你想打好哩份工，不仿追吓。
伸延閱讀
CEO實戰手記：做事要有交代CEO實戰手記：成功源於態度CEO實戰手記：學會操控自己的情緒CEO實戰手記：禮貌及世故CEO實戰手記：全力以赴，做到最好CEO實戰手記：正面態度：建立人際網絡 CEO實戰手記：職場如戰場CEO實戰手記：年輕人如何成職場達人CEO實戰手記：職場達人速成班—「草莓族」CEO實戰手記：職場達人速成班—工作態度CEO實戰手記：初出茅廬要先學犯錯CEO實戰手記：職場新人八個錦囊
