透支

出來做o野，同事間緊係互相幫助，有時你幫吓我，有時我幫吓你咁。不過，一個如假包換o既老妖怪可以好巧妙係咁抽水，自己又唔使點付出。

話說有個手袋黨「德高望重」o既無兵司令老妖怪，已經係三朝元老。佢同啲高層識於微時，同聲同氣，成日去啲手袋黨飯局。可能有高層照，佢先可以去到今日「迄立不倒」，而佢啲老闆就好似走馬燈係咁轉。佢份人好鬼滕雞，成日要人follow啲好多多餘o既policy同standard，所以大家都唔係好鍾意同佢合作。

老妖怪in-charge個project有鑊氣，個妖怪見大難將至，當然就發哂茅去等搲人幫手。不過，咁唔好彩個個project都如火如荼，邊有人得閑幫佢。老妖怪真係老妖怪，畀著其他人可能已經投哂降，佢可以唔理人地忙到PK，照lur人地幫手，off sick病到五顏六色o既都照lur。人地唔理佢，lur唔到就凶，凶唔到就扮死狗。lur到你心煩，lur到你發蚊増，最後lur到采佢先心息。

講真個project都幾high-profile，鑊o左真係死得人。佢又寫包單，話只要翕頭幫手，就會幫你搞埋啲細節，唔使上身。有個比較抵得諗o既同事見佢扮到咁可憐，咪動o左惻隱之心去幫手。點知個妖怪捩手就瀉哂啲o野畀人，仲要粒聲都唔出，息埋電話同老公去馬爾代夫濳水(哈哈，如假包換o既「玩濳水」)，要人去執佢啲蘇州屎，真係好鬼賤。聽講話今次已經唔係第一次，次次都要人執屎，一而再，再而三，將自己o既誠信透支。

最抵死係，有一日，o個個同事應承幫其他同事手o既時候，佢過來搭訕，扮可愛咁問點解今次應承得咁爽，上次又冇咁爽o既？厚面皮得佢！乜佢唔知自己誠信破哂產，有人肯幫佢咪執到。抽水抽到咁入型入格，真係至高境界。