審慎理財
壹周刊介紹o左個億萬散户，每日過一啲好簡樸o既生活，但佢o既股息、收租收入可以媲美一個上市公司o既CEO。SARS之後，香港地多o左啲對錢財好執著o既中產。佢地對物質要求好低，但係管有大量o既財富。冇乜嗜好，話題離不開投資、理財，以此為樂。
小弟唔係鼓吹乜o野消費主義，洗腳唔抺腳，當然唔啱。好似美國佬洗腳唔抺腳，唔係點會搞出呢個次按o既大頭佛。小弟又唔係批評人地o既生活取態，對物質o既要求人人唔同，點洗錢法好個人o既。但過份審慎理財，應洗o既唔洗，就失去金錢應有o既作用，金錢只淪為銀行户口上一個數字而已。 隨著金錢o既不斷積聚，有冇諗過橫掂啲錢都洗唔哂，將多餘o既錢用來幫助有需要o既人。定期捐出一部份o既收入，可以幫到人，又可以增加金錢o既流動性，帶動經濟。幫到人，又唔影響自己，何樂而不為。
唔係咁都要貪嘛?
有啲極端o既o既例子，本身已經好有錢，但係會不段鑽空子，希望可以係社會抓多啲。好似前排o個單藥材鋪老闆呃綜援咁，o個個人有樓有錢，有三個物業收租，又有八百萬資產，但係照住公屋，攞綜援。綜援係一個社會o既安全網，用來幫助一啲生活暫時有問題o既家庭。為o左一己私利，濫用綜援，令到真正需要幫助o既人得唔到有o既幫助，o個啲人良心點過意得去?
取諸社會，用諸社會
講開又講，前文講有部份中產係近年股票、樓宇升浪中獲利不少，而基層係資本増值o既遊戲中好似係大輸家。而今經濟逆轉、通漲猛如虎，基層生活苦不堪言。有博客揚言佢賺o既錢只係幫社會暫時保管，佢情操之高，小弟真係萬分佩服。小弟諗而家基層水心火熱，身為中產o既我地係唔係時候盡啲社會責任，回饋社會呢?
伸延閱讀
壹周刊 - 隱世油王 一億身家住美孚
生銹的爛鐵鎚 - 陽光少年與陰天少年
文建會兒童文化館 - 一片披薩一塊錢
投資日記 - 今期壹周
天然氣價格上升對內地燃氣股是好事嗎? 【市場先生直播精華重溫】#華潤燃氣 #中國燃氣
23 hours ago
4 comments:
人天性本身就有貪念,究竟乜野係夠,幾時係夠,好難介定.當人覺得自己”夠”,佢地先至會諗下點樣去回饋社會,所以講就容易,要啲人(尤其是中產) 盡社會責任,佢地實會問,點解係由我做起,而唔係由李嘉誠做起?!
有錢佬都好有「社會責任」，台灣首富郭台銘、Bill Gates、Warren Buffett都分別將畢生o既財富捐出。李超人都有發財立品，都捐十億俾港大醫學院。不過，就低裝啲，要人地以佢o既名命名之嘛。
「社會責任」呢家o野其實講緊良心，每個人良心把尺有長有短，冇一個準則。如果你問尤努斯為乜做咁多o野幫啲窮人，佢會答你「盡社會責任」，但係係有啲人心目中奉公守法已經做到「盡社會責任」。
其實，做善事，多多益善，少少唔驅。憑良心做善事已經好ok。如果每個人都肯出小小力，社會真係會好美好。
唔知點解有啲blogger講到自己好偉大，搵返來o既錢，講到係社會借畀佢，遲啲會回饋社會云云。小弟諗而家通漲咁犀利，基層生活咁慘，o個啲blogger係唔係應該做翻啲o野，回饋吓社會呢?希望佢唔係表裹不一，順口開河啦…
好同意，我地學投資係要錢為我地工作，而不是我地為錢工作，千萬不可成為錢的奴隸！
不過話說回來，大口仔的生活都好樸素，每月洗錢唔多，不過我快樂。 :)
啲守財奴真係好難頂，眼裹面淨係得個錢字。多有多洗，少有少洗，做人最緊要開心。
Post a Comment