報平安 ‧三

今日有啲塞車，所以遲o左小小返工。一坐低o左，準備開工之際突然收到老闆o既call，叫我去meeting room搵佢。仆街，我賴o野！行去搵佢個時，又另一位同事行過，見佢面如死灰，我知我都係命不久已…

去到meeting room，老闆好cool坐o左係到，目無表情，真係好似劊子手。老闆之後話我知你個role redundant o左，要cut我。ok，fine！我都知佢唔會俾到個合理o既answer俾我。我問有冇其他option，佢地好決絕話冇。之後，HR對o左疊o野俾我，叫我返屋企自己睇！我問吓疊o野有啲乜information，佢好唔耐煩咁叫我返去屋企睇o左先，有問題打去HR到問。仆街！問兩句都唔阻你好多時間，使唔使咁絕呀！

山雨欲來風滿樓，連日來o既小道消息，已經令我麻木。之前幾個月，小弟同老頂傾開計，小弟都會想向老頂套少少料，但次次換來o既答案，佢都唔知，老闆唔肯透露半句。老項之後會向我大派心丸，話做得o野o既人係唔會有事。小弟自問做得o野，又係自己o既area做到啲口碑，小弟條team又expand緊，又有幾個大project揸手，再加上逗緊最低工資，要死大把人合資格過我，自以為我會過到哩關…過份o既自信，令我有啲方寸大亂，plan好o既旅行，都要取消。我真係好想去o架，今次去唔到又唔知幾時先可以去。

諗翻最低工資，每次小弟同老頂傾pay o既時候，同老頂講我同market爭o左一大折，唔該幾時俾翻個fair pay俾我。老頂就會好似錄音機咁講翻同一段說話，management係fair o既，佢地係睇到你o既contribution。overpaid o既同事係downturn o既時侯會成為公司o既目標。你係公司o既network，係一個好大o既 intrinsic value。要patient，你有o既value有一日係你progression o既好重要asset，真係好鬼動聽。我都知佢係狗o翕，但我又唔可以同佢反面。想跳草裙舞，出面個market咁，想有個似啲樣o既offer都難…一動不如一靜，只好無奈留低繼續做。‧

諗諗吓，其實之前已經有跡可尋，apply o左個course遲遲未approve，同老頂求証，老頂話唔使擔心，可能近排公司太亂所以老闆冇時間approve，佢會幫我追。只好怪自己唔sensitive，應該sense到自己係壯士又o既其中一人。

cut完人之後，個team restructure，我以為我個role真係直接cut o左。估唔到我個role居然冇cut到，仲要俾個人工係我double o既同事坐o左，反而個同事個role cut o左。仆街！又話我個role redundant！redundant你條毛，cut我去救你自己個親生仔先係個答案！！而那邊廂，老頂都唔係好好過，佢俾另一個老闆o既親信take over o左個佢role，而家唔知燉o左去邊…

真係一肚氣！！做得o野o既人係唔會有事？management係fair？通通都係廢話，係弱肉強食o既世界，冇fair唔fair，只count邊個o既network strong啲。你係你個position做得幾好都好，人地都可以為o左自己o既利益犧牲你…乜Q patient？乜Q intrinsic value？我都未舔到我應得o既就俾人郁o左，而家個個agent都用我below market o既pay同我討價還價，我都唔知幾時先可以追翻我個fair pay…

別人作的業，今天我受了。他朝君體也相同，大家好自為之…

seven隨想

今日行過seven，見到有個昂藏六尺，肥施大隻o既阿哥，同一個年過五十係seven打工o既阿姐嘈。係好奇心驅使下，我行o左入seven八吓。

個故仔係，阿哥係seven打雜誌釘，可能阿哥身形過份龐大，阻到啲客出入，阿姐有啲微言，話o左個阿哥幾句。阿哥不甘被話，就同阿姐嘈起來。之後，阿哥攞o左部iphone出來拍movie，又聲大夾惡一輪咀係咁問個阿嬸，做咩話佢阻住哂，唔通唔可以買o野o架…擾攘一輪，到最後，居然要call阿sir來調停，真係浪費警力。過o左幾分鐘，阿sir到o左，例牌分開佢地兩邊分開傾。之後，阿sir例牌好言相勸，叫條友唔好搞大件事，乜乜乜。最後，阿sir備o左案，就打發o左條友走。

打書釘，小弟成日都做。但係seven又唔係書局，唔係老馮可以打書釘。如果阻到人地做生意，而人地又出到聲，當然係走人。如果持住乜o野「顧客權益」，可以咁厚顏話翻人地，真係唔知而家係乜o野世界。

又，而家啲阿sir真係冇o左啲以前o既威嚴。咁小o既事，都要努煩阿sir調停。如果係以前，條友早就畀阿sir「的」o左入後巷，鬧佢一輪，凶佢「浪費警力」，先打發佢走。邊會o徒咁多時間，聽條友發惱騷，而家做阿sir真係EQ低啲都唔得。

呢件事，令我諗起02年元旦文化中心掟花盤「新年快樂」事件。九七之後，係警隊甚至成個政府，真係冇o左份威嚴，冇o左份管治威信，畀人冇乜執行力o既感覺。係老董時代，老董空有抱負，但係冇乜作為。所謂「議而不決，決而不行」，其實係心有餘，而力不足，有心無力是也。

去到最近，特別係呢一兩年，真係有種「無為而治」o既感覺。政府只識頭痛醫頭，大方向o既野真係欠奉，今年o既財政預算真係最好o既example。呢份財政預算只keep住繼續派糖，乜o野「六大產業」，乜o野「解決深層矛盾」，真係唔見有咩著墨。

Change啱啱係高清台播完，朝倉啟太誤打誤撞做o左日本總理大臣，改變o左整個政界氣侯。雖然Change只係一套電視劇，好多o野係現實世界跟本冇可能發生。不過係o個一刻，正正喚醒o左一種已經遺忘o左好耐o既諗法。今時今日o既香港，我地唔再要有心無力o既老董，更加唔要一個畏首畏尾o既煲呔。我地要o既係一個唔怕得罪權貴，唔怕失敗，身體力行，敢於創新，有遠見，有魄力，有抱負，有承擔o既特首。

賣地

等o左半年，終於肯出手禁吓個樓市。不過，將軍澳已經升到八千蚊尺，元朗五千蚊尺先來禁！！真係後知後覺…

伸延閱讀
定期賣地

月光族

明明畀cash可以平七舊，都仲要碌card。咁大個人連兩萬幾cash都冇…唔通真係月光一族？！

其實我仲係唔係扑客？

一個月都冇一個post，出親都係啲人講都爛哂o既topic…我諗我真唔係扑客。

Anyway, Merry X'mas and Happy New Year!!

定期賣地

自從定性「八萬五」為一個弊政後，「定期賣地」就畀人打入冷宮，取而代之係「勾地表」。但係「勾地表」擺明唔work︰一、「勾地表」冇乜透明度，冇人知咩價先可以勾到塊地。就算勾到，都可能俾其他人投o左，勾地o既incentive大減。二、如果冇人勾地，可以成年冇地供應。政府冇得調節土地供應，主動權去哂地產商到。而家政府好似隻冇牙老虎(不留都係)，政府想用調節土地供應間接調控樓價，no way。

政府可以「定期賣地」增加或者減少土地供應去調控樓價。點解唔可以重提「定期賣地」？「定期賣地」有乜問題？唔好話畀我聽「定期賣地」等如「八萬五」，要政治正確，就唔可以提「定期賣地」。除o左官商勾結之外，真係諗唔到有乜理由…

又，時移勢易，行o左「高地價」咁多年，大家都知道再行落去，係死路一條。雖然老董曾經想反轉佢，不過眼高手低，賴o左o野。吸取上次o既教訓，其實可唔可以做得聰明啲，冇咁多反彈呢？如果梁生真係做o左下任特首，可能會行呢條舊路。到o個時，真係唔該佢唔好老董時期咁眼高手低啦。

放假

放o左區俱俱一日假o者，都可以搞到七國咁亂。啲人再係咁玩卸膊，玩失蹤，遲早爆大鑊。真係要放個長假，等佢地再冇借口推卸責任，可以自動波揹翻自己o既責任，make一啲佢地應該make o既decision。