識走位

出來做o野，識走位真係好緊要。識走位o既人做o野輕鬆得來又做得出好成績，老闆都好buy佢。但係所謂「能力越大，責任越大」，如果老闆睇佢臺戲，佢冇可能會輕鬆、得閑，究竟識走位o既人點可以做到咁?真係耐人尋味。

話說有個senior，幾識走位。每日返工nine to five，又吹得，technical又得，老闆都幾睇重佢，但係佢對新人o既態度，就真係不敢恭維。老闆叫佢coach個fresh grad，照常理會有個development plan，幫個fresh grad搵啲task做，或者arrange啲training畀個fresh grad咁。薯不知，過o左幾個禮拜，乜都冇，唔好話development plan或者coach佢啲乜o野，甚至連計都唔見佢地傾多句，個fresh grad就咁白坐o左幾個禮拜。之後個fresh grad可能悶得滯冇o野學，probation未過就quit o左。其實個fresh grad都幾smart，就咁走o左真係幾可惜。

唔好話新人，佢對其他junior o既態度，都係嘛嘛。junior有事搵佢幫手或者有o野唔識搵佢問，佢好似黑洞咁，永遠冇反應，永遠叫唔郁。叫佢幫手，就黑哂口面，又話一又話七，話做緊佢個project啲o野，好忙。唔好玩啦，係人都知佢個project都未開工，忙乜Q o者，無非係想耍啲junior。就萛肯幫，永遠講到自己好偉大，放低哂手頭上o既o野幫你。不過，佢成日五時花六時變，佢可以幫幫吓心情唔好，轉個頭可以話老闆有urgent o野要佢跟，pat低你唔理。

最叻係係老闆面前認叻，老闆要人接啲豬頭骨，佢二話不說接o左返來，拍哂心口話會搞掂。點知佢可以捩手昆啲細執佢o既屎，跟住又唔跟唔理。啲細搞唔掂，老闆問起，又擺啲細上台。

有次同事請飲，又咁唔好彩，撞正有production issue，照理佢係project in-charge，佢要返公司救火。佢可以夠胆死叫啲junior唔好來飲住，返office救火先，而自己繼續係酒樓同老闆打牌。

聽聞老闆已經推薦佢升，等緊大老闆o既approval。識走位o既背後，真係smart，定係夠厚黑?小弟仲未諗到答案。