國王與我

今日，一翻到公司就俾老細捉o左入房D9，D足成個鐘。大佬啊！我唔攰，你把口都攰啦。之後坐唔夠一陣又俾個客急call要去佢到support。我心諗個system咁L爛，點救都哂氣啦。都話d system唔好判被大陸做啦，d o野咁L爛，出黎都係一鑊粥，又係做L死我地呢d 做support o既。不過見到老細圓壇咁o既面，只好死死地氣搭$7.9冇得claim地鐵去個客到睇吓啦。講真宜家個市咁好，如果我搵夠本，日日抄翻兩轉都夠使啦！使乜仲屈係到日日受氣姐。時間過得真快，話咁快天又黑齊，個system救極都救唔到，個客走o左過黎叫我走。我心諗個客都係打份工姐，今日救唔到咪聽日救，我唔走佢都唔走得啦。只好死死地氣撥個輪俾老細，話今日救唔到，聽日去個客到遲d番。講都未講完，即刻俾佢DLM，話我小小事都攪唔點，正食塞米。萛！忍佢。唔好俾我一朝發達，到時睇我點玩你間公司仔。

放o左工，搭$8.2地鐵番屋企。去到屋企樓下先醒起，頭先趕得滯漏o左叫個客簽番個log，聽日記得叫個客補番，唔係又俾機會老細炸我形。正係到諗o野o既時候，又撞到皇帝啊伯係到練字。講真政府使乜使咁多錢去推廣藝術，叫吓啊伯去十九區練吓書法咪當十九區巡迴藝術展覽囉。住翠屏邨o既街坊見到啊伯練字，都見怪不怪囉。幾十年佢風雨不改，日寫夜寫，邨裹面d牆啊、花槽啊都留有佢o既墨寶。其實佢都好勁，揸住柺杖可以去到天星碼頭同埋愛丁堡廣場碼頭練字。不過，寫來寫去又係佢o既「皇室」族譜：「九龍國王曾灶財曾當堂曾榮華…」。聽d街坊講佢有仔有女，不過唔係賣o左鹹鴨蛋，就係移鬼o左民。又話啊伯有個老婆，但係走o左佬。練字時成日被d差佬搶筆，有次坐埋監添。不過自從佢紅o左，d差佬就小o左逗佢喎。

近排，啊伯真係幾紅幾威吓。啊伯d真跡被人用o左黎做fashion design，不過好似冇人俾番d版權費佢。又上過電視廣告，不過話人工好un，之後社署話要扣番綜援添，真係「乞衣兜裏拿飯食」。啊伯d墨寶又話係威尼斯展出過，好似話係有史以黎唯一o既香港展品喎。最威係佢d墨寶被人攞o左去拍賣，好似話賣o左五萬幾蚊，都唔知係真唔係。

不過細細個啊媽見我唔讀書成日掛住打機o個時，就話我第二時老o左會變成啊伯咁。諗落啊伯又幾慘，人又傻傻地，講o野一舊舊，行路跛跛吓，成日被人蝦，仔女唔理佢，老婆走o左路。如果老o左會真係變成咁，真係折墮。都係唔諗咁多番屋企食飯先，唔係今次輪到老媽子炸我形。 聽日買番條暑假金多寶，中o左就劈炮唔撈。個system老細自己救，睇吓到個時邊個食塞米。

=================================

你老母都戇狗，朕不知幾逍遙自在。得閑微服出巡，玩下書法。得閑拍賣下自己o既墨寶或者去拍下廣告，都有成幾萬蚊洗下。再唔夠錢洗，就去御用錢莊(社署)攞d零用(綜援)。點好似你班賤民咁終日營營役役，為o左幾個臭錢打生打死。或者成日抄金抄樓抄股票，好以為抄哩抄路會一朝發達，不過一個金融風暴又米係就成副身家冇Q曬。做人最緊要知足先至開心，睇你都係唔明嫁啦。

「別人笑我太瘋癲，我笑他人看不穿。不見五陵豪傑墓，無花無酒鋤作田。」