通脹‧罷工‧中產

係經濟走下坡，物價飛升o既時候，各階層o既人都suffer緊，不過通脹對基層o既影響一定係最大。再加埋基層人工不升反降，基層真係幾灰。你睇啲罷工潮一浪接一浪，維他奶、屈臣氏蒸餾水罷工，今日又有雀巢罷工，就知道基層對工資甚至係生活真係有啲聲音。

講真，邊個唔想政府對自己保障多啲，政策公平多啲。政府開倉派糖畀基層，中產有反對聲音，小弟可以理解。小弟唔係話中產唔應該出聲，但係撫心自問，中產係上次o既經濟升浪中得益o左唔少，相對地基層好似攞唔到啲乜o野。中產今次可唔可以捱吓義氣，俾政府政策傾向基層多啲，照顧吓啲基層。

大口兄講o左個小弟好buy o既point，通脹只係導火線，新移民政策同大企業壟斷其實係今日困局o既主因。政府唔對症下藥，反而只開止痛藥拖延病情。 再加上社會o既流動性不足 ，社會o既怨氣一日一日咁積聚落去，小弟諗七一好快又會重演。

伸延閱讀
明報 - 蔡子強﹕香港中產只講「着數」﹖
大口仔筆記 - 誰來為中產出口氣？