多謝pakman

多謝pakman，俾讀者們明白生果報一班自命自由派理念嘅底蘊。pakman叫人冇錢就唔好生，話加綜援係「押掉未來，換今日之快」。尹sir之後又講「如果養唔掂，就唔好生，咁先至係負責任既行為」，話死者王嘉梅嘅父母要對佢嘅女嘅死負全責(後記，尹sir只是無心之失，已經為此道歉)。

「押掉未來，換今日之快 」
唔知幾時「難入職、難入行、難轉行」入哂綜援、最低工資嘅數，經濟轉型、新移民政策、政府嘅無能、商人嘅短視好似唔關事。讀經濟嘅無理由唔知經濟問題係多因多果嘅關係，入哂綜援、最低工資數好似以偏概全啲。香港走下坡，大家都唔想，窮人要suffer，有錢人都要suffer。當窮人suffer嘅時候，有錢人唔使伸出援手，由得啲窮人自生自滅，唔係咁可以叫做「公平」。如果援助窮人叫做「押掉未來」，咁香港就真係冇未來。

咩係香港嘅未來?
如果問小弟咩係香港嘅未來，小弟會話小朋友先係香港嘅資產，香港嘅未來。小朋友是將來繁榮嘅基石，稅收嘅來源。今天不投資，他日只會吃稅基收窄嘅果，所謂嘅「倒置人口金字塔」。pakman，可唔可以當小朋友係香港長線嘅投資呢?如果可以，我諗香港人唔應該再focus係綜援上，而應該focus係改善隔代貧窮上，啲錢點先可以幫到人。

唔係人人呃綜援
家家有本難念的經，撇除啲呃綜援嘅case，好多時唔係做父母嘅冇計劃去生仔，而係一啲唔可以預計嘅事(失業、離婚、夫妻離世)打破了成個計畫，所謂「人萛不如天萛」。想當年六七十年代，家族、鄰里互助。一個屋企有事，啲親戚同埋d鄰居都即刻幫手。時移勢易，今天，家族、鄰里關係薄弱，「各家自掃門前雪」。屋企有事，最好收埋唔好俾人知，費時啲親戚鄰居以為會拖累佢，受人白眼。誰可幫有問題嘅家庭，政府係責無旁貸。

咩先至係負責任 ?
有冇錢只係生唔生係其中一個因數，更何況生一個要幾多錢冇準則(唔好話俾我聽係四百萬)。其實commitment先至係最重要，愛你自己嘅小朋友，樂於用時間愛心照顧自己嘅小朋友。有好多有錢家庭兩公婆都有自己嘅事業，跟本冇時間照顧自己嘅小朋友。照顧教育小朋友嘅責任，就落係菲傭同學校身上。依賴外人教育小朋友，最後嘅後果不言而喻。有錢又好窮人又好，如果冇心照顧自己嘅小朋友，就真係唔好生。

小朋友係快樂泉源
小朋友係好多父母嘅快樂泉源，父母嘅希望。你睇四川遇難小朋友父母幾痛苦，呼天搶地，欲哭無淚。小弟諗pakman同尹sir可能太年輕，現在未必領略哂。 到成熟啲(特別係pakman，唔好咁大個人都成個kidult咁)，做人父母嘅時候，就會明白。

最後，VC兄，小弟撐你！

延伸閱讀
孫柏文 - 多謝《一百萬人的故事》
尹思哲 - 長江七號唔好睇，但呢句好有骨氣
尹思哲 - Rest in peace
尹思哲 - 「養唔掂，就唔好生，咁至係負責任既行為」