Thursday, April 9, 2009

管理新鮮人

最近,大口兄計數兄都係佢地o既blog入面講一啲管理層o既感受, 小弟不約而同,係工作上都有類似o既挑戰。

自從老闆要上位,小弟就被迫要頂埋老闆o個份,工作真係繁重o左好多。好多以前同撈同煲o既兄弟,而家變成上司下屬o既關係,小弟從此夾係老闆同兄弟中間,成為佢地o既傳聲桶。老闆對小弟o既期望好大,兄弟又想小弟幫佢地fight多啲o野,左右做人難,真係有口難言。作為管理新鮮人o既小弟,工作成日碰壁,真係有啲力有不從心o既感覺。

小弟有一個心魔,好想hands-on。老闆都有warn我,我哩個位係負責幫啲細o既執屎,越做上去,執o既屎越多。好玩o既o野,應該留畀啲細做。小弟睇o既應該係成team人o既成功,個人o既榮辱唔該你擺埋一邊…哩一點小弟都好明…老闆又係到吹水。不過,吹水還吹水,吹完唔好咁認真。有啲o野佢自己當年都做唔來,一有起事來,老闆又捉住哩個point係到起勢捽我,真係想死。

老闆好鍾意講empowerment,佢成日話自己最成功o既就係上年消失o左兩個月,個team都work as usual。 佢又鍾意講,佢以後就係我o既客,要小弟manage佢…不過,佢又好鍾意,係其他人到接好多冇value o既job返來。你同佢say no,佢就話要同人地搞好啲關係。佢又好鍾意bypass我直接assign啲task畀啲細o既做。同佢講翻,佢話冇下次,下次咪又故態復萌 ,真係講一套做一套…

新丁o既小弟其實對「管理」真係心有千千結…

對啲不時魂遊太虛gen-y o既下屬,點可以令佢專心工作?
對啲o野o野都好似有特權老屎忽o既下屬,點可以可以叫佢地立個好榜樣畀啲細o既睇?
對啲每事問o既下屬,點可以做好enpowerment?
對啲「食o野唔做o野,做o野打爛o野」o既同事,點可以唔使o野o野幫佢補鑊?
對老闆啲不切實際o既要求,點可以陽奉陰違?

有冇網友有可分享吓自己o既心得,可以畀小弟從中偷吓師呢?

伸延閱讀
大口仔筆記 - 新一頁
活在中層 - 管人學問
活在中層 - 管人學問(2)

11 comments:

市場維京人 said...

總之乜嘢都掟俾下低 D 人做,唔係你真係冇時間服待你老細。做得你老細,一定係識吹水玩 strategy,最好可以陪佢巔埋一份。

個人意見:

> 對啲不時魂遊太虛gen-y o既下屬,點可以令佢專心工作?

唔理佢係咪魂遊,有 deliverable 就得。

> 對啲o野o野都好似有特權老屎忽o既下屬,點可以可以叫佢地立個好榜樣畀啲細o既睇?

呢 D 下屬最 PK,要諗辦法俾 D 鑊氣嘢佢哋做,做唔掂乘機搵藉口炒人。

> 對啲每事問o既下屬,點可以做好enpowerment?

搵 D 做得嘢嘅下屬 guide 住佢哋,唔駛自己煩。

> 對啲「食o野唔做o野,做o野打爛o野」o既同事,點可以唔使o野o野幫佢補鑊?

都係同上,搵 D 做得嘢嘅下屬 guide 住佢哋,唔駛自己煩。咁樣又可以俾做得嘢嘅下屬你好似好俾機會佢哋上位咁。

> 對老闆啲不切實際o既要求,點可以陽奉陰為?

Depends on。有 D 老闆係鐘意 D 下屬頂佢頸,乜都拗一餐先安樂嘅。有 D 老細就絕對唔容許下屬同佢駁咀。呢樣嘢小弟都同你一樣學緊。

Cheers!
:P

安諾勿斯 said...

維京兄︰

小弟有時真係身不由己…係老闆「強勢」領導下,小弟o既空間真係小之有小。想掟啲o野畀啲兄弟做,一係啲兄弟要做老闆直接assign o既task,冇時間entertain我;一係老闆直接override我o既assignment,叫我要知人善任,啲芝麻緣豆o既o野應該搵啲好fresh o既junior做。搵o個junior做,o野o野要捉住手仔,即係等如自己做啦…

交到功課當然係個must。不過,你明知佢full-power可以做到200%o既o野,而其他人做到死死吓,佢可以準時走人,其他人會點睇呀?

對啲老屎忽,小弟真係冇佢地辦法…佢地都曾經直屬於老闆下,佢地有幾多料,老闆心中有數。再加上,佢地係個team o既中流柢柱,老闆好依重佢地,老闆炒佢地o既機會係零。

小弟都用過哩個approach,不過唔係好work。啲老屎忽好識轉膊,第一,junior問佢地,佢地會話自己都唔識,或者話自己話唔到事,總之耍到個junior陀陀擰;第二,佢地會話自己好忙,睇唔哂啲o野,問o野要排吓隊先。最後,小弟一捽個junior,junior都係要小弟幫佢地resolve或者要小弟o徒時間去捽啲老屎忽幫佢。

成日「打爛o野」o既同事其實本來係同老闆同level,而家變o左under老闆。之前,大老闆在位,大老闆已經成日保佢。而家老闆上位,老闆唔想照顧佢,要小弟照顧佢。佢成日做錯o野,真係長貧難顧…

經多年o既觀察,成日頂老闆頸o既最終都會消失,所以做一個順民o既存活率好似高啲…

市場維京人 said...

你嘅 situation 小弟完全明白,不過真係啞咗唔識回應。

唯有講句:沉著應戰。

Take care.

N/A said...

努力,我仲未有資格管人,幫你唔到,或許問下CK 老闆會有新 idea !

安諾勿斯 said...

多謝維京兄同巴林兄o既留言。

其實都冇乜o野,小弟都係呻吓o者,有大家o既鼓勵已經好開心。

Marshmallow said...

恭喜你榮升喎!

小女子既意見係, 好睇你既角色. 如果你係個team leader, 就一定要hands-on一啲, 如果唔係你領導唔到班細既去聽你支笛. 老細係manager, 本身個角度唔同, 老細係要打關係, 要motivate人... 好多時候, motivation係要靠empowerment, 咁啲staff先會覺得受重視.

Marshmallow said...

補充: 對住啲老屎忽, 真係同對住打爛野又唔識拾既同事, 一樣咁噴血... 對老屎忽只有一個方法, 就係捉佢痛腳, 一隻叫"佢老細", 另一隻係所有有可能要佢背鑊既野. 佢唔係蠢架, 佢唔係唔知有野要做, 但係對佢冇好處既, 做乜要幫你? 除非唔做對佢有影響, 又或者做咗對佢有好處, 佢先至會做啫.

再唔係, 就要行"稱兄道弟", 又或者"隔山打牛"啦. 咩叫隔山打牛? 咪係叫一啲老屎忽既stakeholder, 通常都係佢既客仔, 出聲要佢做. 點隔山打牛? 呢樣就好睇你個情況同你要佢做野既性質, 慢慢落毒!

Marshmallow said...

再補充: 講開motivation同empowerment, 緊記老細要係既角色係點. 如果佢要你做無間度, 更加要落手落腳: 有咩老細唔鐘意既你要出聲, 加把口, 小弟都唔想架 (呢啲野, 老細同你有默契架啦). 一但俾班細既睇串係企係老細嗰邊, 你既角色(亦即係你既用途)就玩完架啦, 所以一切要小心行事!

安諾勿斯 said...

多謝棉花姐!

都唔係乜o野升職,轉o左role o者。係海嘯底下,好多o野唔輪到小弟揀,真係有咩做咩…

中產管數男 said...

我都好有力不從心既感覺, 今日我又有兩條o靚互插對方不是...煩...

安諾勿斯 said...

小弟o個邊都有咁o既問題…

唔知係啲細對佢個大佬(都係under我o既)有心病,定係個條友成日唔理啲細,搞到眾叛親離…啲細好鍾意架直接搵我,架空o左條友,好鬼死煩。

又唔知點解,條友好鍾意當住我面前片啲細o既,啲細o既跟住還拖,最後變成互片,真係唔知好嬲定好笑…