好書推介 - 《金融圈内》&《金融圈内2》

睇完蔡東豪o既《金錢之王2》，講及對沖基金基金經理點投資有道，年尾可以分幾球花紅，令人趨之若鶩；扭轉乾坤，彈指間支配市場，令人大開眼界。但係交易操作(操盤)o既心得同手法就隻字不提(可能因為筆者都唔係內行人)，會唔會有啲到喉唔到肺o既感覺？一個如假包換o既基金經理錢志健寫o既《金融圈内》&《金融圈内2》可令你窺探一二。

書中，錢sir講述對沖基金點樣控制投資回報，提出用期權對沖避險o既方法同技巧。 佢成日掛佢自己操盤o既原則: -

「順勢而行，長短均可，風險控制，量力而為。」

係口邊。 一個散戶如果可以做到錢sir所講o既減少交易次數，睇準長線時機，放棄短線買賣，睇唔通就唔好落注，利用長短倉去捕捉趨勢，嚴守止蝕，唔好做過份o既槓桿，咁你o既投資心法就可以達到到基金經理o既水平(不過，當然唔代表你可以賺到錢，因為你都未有基金經理o既投資技巧)。

有趣o既係，唔好話number，錢sir從來唔會係佢信報o既專欄入面畀個一隻港股o既意見。佢講得最多o既係佢o既美股模擬投資組合，好似做Blackberry o既RIM同Google咁o既美股。係充斥即食文化，吓吓講number o既財金專欄世界，佢o既專欄咁都仲有讀者，唔使摺，真係沙漠清泉，誠意推介！

延伸閱讀
錢志健 - 投資看人生